L-Iskema ta’ Appoġġ għat-Taħriġ u l-Iżvilupp hija waħda mill-għodod tagħna biex nittrattaw u nimplimentaw l-istrateġija attwali tal-Kunsill Malti għall-Arti, b’enfasi fuq it-trawwim tal-potenzjal kreattiv u l-appoġġ għall-iżvilupp tiegħu f’attività professjonali. L-Iskema ta’ Appoġġ għat-Taħriġ u l-Iżvilupp tinqasam f’żewġ fergħat.

• L-Ewwel Fergħa tappoġġa l-iżvilupp professjonali kontinwu ta’ artisti, operaturi kulturali u studenti Maltin jew ibbażati f’Malta li jkunu attivi fis-setturi kulturali u kreattivi u li jixtiequ jieħdu taħriġ professjonali tul żmien qasir biex itejbu l-ħiliet tagħhom u javvanzaw fl-ispeċjalizzazzjoni tagħhom.
• It-Tieni Fergħa tappoġġa l-iżvilupp u l-esponiment ta’ artisti żgħażagħ Maltin jew ibbażati f’Malta li jkunu attivi fis-setturi kulturali u kreattivi. Il-fond jappoġġa opportunitajiet ta’ taħriġ tul żmien qasir li jtejbu, bla ma jissostitwixxu jew jissussidjaw, il-programm ta’ taħriġ attwali tal-istudenti. Tappoġġa wkoll il-parteċipazzjoni tal-kreattivi żgħażagħ fi pjattaformi internazzjonali, fosthom iżda mhux biss, kompetizzjonijiet, esibizzjonijiet u/jew prestazzjonijiet.

Il-programm jirrifletti tendenza lejn aktar professjonalizzazzjoni fis-settur kulturali u kreattiv u l-promozzjoni ta’ kultura imprenditorjali fost il-professjonisti kulturali. Jipprovdi opportunitajiet biex jissaħħu l-bażijiet tal-għarfien u l-istrateġiji tal-impriżi kulturali u kreattivi. Permezz tal-investiment fi proċessi maħsuba biex itejbu l-kwalità meħtieġa ħalli jiġi ġġenerat xogħol artistiku eċċellenti, l-għan tagħna huwa li nappoġġaw l-iżvilupp ta’ ekoloġija kreattiva sostenibbli biex b’hekk nipprovdu valur miżjud u opportunitajiet ta’ impjiegi fis-settur.

L-għanijiet tal-Ewwel Fergħa (minn 18-il sena ‘l fuq) huma li:

• Tappoġġa l-iżvilupp professjonali kontinwu tal-artisti u tal-operaturi kulturali fl-esplorazzjoni, fl-iżvilupp tal-ħiliet, fil-bini ta’ networks u fl-involviment f’kollaborazzjonijiet nazzjonali u internazzjonali.
• Trawwem l-eċċellenza fl-oqsma tal-arti u l-kultura u l-avvanz tal-għarfien u tal-kapaċitajiet f’oqsma relatati.
• Tinvesti fit-taħriġ u żżid l-opportunitajiet għall-artisti u għall-professjonisti kreattivi.
• Tħeġġeġ l-iżvilupp intellettwali professjonali u l-produttività.
• Tħeġġeġ lill-professjonisti kreattivi jkomplu jiżviluppaw il-ħiliet tagħhom u jieħdu sehem fi pjattaformi fil-livell nazzjonali u internazzjonali.

L-għanijiet tat-Tieni Fergħa (bejn 8 snin u 17-il sena) huma li:

• Tappoġġa l-iżvilupp u l-mobbiltà tal-kreattivi żgħażagħ permezz ta’ opportunitajiet ta’ taħriġ, esplorazzjoni, networking u involviment f’kollaborazzjonijiet internazzjonali.
• Tħeġġeġ u tagħmilha eħfef għall-kreattivi żgħażagħ li jespandu l-ħiliet tagħhom u jinvolvu ruħhom b’mod attiv fi pjattaformi internazzjonali.
• Tippermetti l-esponiment tat-talent żagħżugħ għal pjattaformi internazzjonali
• Tiffaċilita n-networking ma’ artisti internazzjonali oħra.

L-Iskema ser tappoġja l-attivitajiet li ġejjin:

• Korsijiet ta’ taħriġ
• Korsijiet qosra
• Sessjonijiet ta’ ħidma
• Masterclasses
• Internships
• Apprendistat
• Residenzi tal-artisti
• Job Shadowing
• Provi għall-istituzzjonijiet edukattivi
• Provi għall-proġetti artistiċi
• Networking

Attivitajiet li jissodisfaw l-għanijiet tal-iskema u li m’humiex imsemmija hawn fuq jistgħu jiġu ikkunsidrati jekk l-applikant jipprovdi ġustifikazzjoni.

Fil-każ ta’ networking u residenzi, l-applikanti jeħtieġ li jipprovdu programm li jenfasizza b’mod ċar it-taħriġ jew l-attivitajiet ta’ żvilupp professjonali inklużi fil-programm tal-għażla tagħhom.

Rekwiżiti konformi mal-Istrateġija tal-Kunsill Malti għall-Arti

F’konformità mal-impenn tiegħu li jappoġġja l-arti permezz tal-approċċ sostenibbli u responsabbli tiegħu għall-investiment pubbliku, il-KMA jiġbed l-attenzjoni tal-applikanti għal dan li ġej f’konformità mal-Istrateġija 2025:

L-applikanti huma mitluba jikkunsidraw id-Dritt għall-Kultura – Pakkett ta’ Riżorsi meta jizviluppaw il-proposta tagħhom b’rabta ma’ kif jimpenjaw ruħhom mal-komunitajiet u l-konsiderazzjonijiet tad-drittijiet kulturali ta’ kulħadd fix-xogħol tagħhom. Il-pakkett ta’ riżorsi għandu l-għan li jżid l-għarfien dwar l-inklussività u jappoġġja l-implimentazzjoni tad-drittijiet kulturali fil-prattika tagħna ta’ kuljum.

L-applikanti huma meħtieġa wkoll jikkunsidraw il-Karta għall-Istatus tal-Artist meta jipproponu l-attivitajiet operattivi u ta’ programmazzjoni tagħhom biex jiżguraw kundizzjonijiet tax-xogħol aċċettabbli u deċenti għall-artisti u l-prattikanti kreattivi li jħaddnu l-libertà artistika, l-aċċessibbiltà, ir-rikonoxximent ta’ ħiliet formali/informali/non-formali, kundizzjonijiet soċjo-ekonomiċi deċenti, non-diskriminazzjoni u ekwità, konsiderazzjonijiet etiċi u aderenza mad-drittijiet tal-proprjetà intellettwali u l-liġi internazzjonali tax-xogħol. Il-Karta għall-Istatus tal-Artist hija maħsuba biex tipprovdi qafas dinamiku ta’ referenza għal kwalunkwe leġiżlazzjoni, politika, jew inizjattiva li jkollha impatt dirett jew indirett fuq l-artisti u s-setturi kulturali u kreattivi, u tiżgura li kwalunkwe azzjoni tkun allinjata mal-viżjoni aħħarija fit-tul li tgħolli l-istatus tal-artisti f’Malta f’konformità mal-valur tanġibbli tagħhom għas-soċjetà.