Il-Kunsill Malti għall-Arti jirrikonoxxi li l-festa Maltija hija parti mit-tessut tal-bliet u l-irħula tagħna. Minsuġa ma’ dawn il-festi nsibu numru ta’ organizzazzjonijiet volontarji li jieħdu ħsieb li jippreparaw armar artistiku sabiex iżejnu l-pjazez u t-toroq tal-ibliet u l-irħula f’Malta u Għawdex, jieħdu ħsieb iżewqu l-iljieli sajfin tagħna b’kuluri u ġigġifogu mill-isbaħ, jieħdu ħsieb it-tkattir tal-kultura mużikali kif ukoll il-ħarsien u t-tisħiħ tat-tradizzjonijiet kulturali f’pajjiżna. F’dawn l-organizzazzjonijiet volontarji jinsab nukleu ta’ nies li jaħdmu s-sena kollha b’mod volontarju biex jippreparaw attivitajiet marbuta mal-festa tar-raħal jew belt tagħhom.

Il-Kunsill jagħraf l-importanza li għandhom l-għaqdiet kulturali u għaqdiet soċjali Maltin li jaħdmu b’mod volontarju, fit-tkattir, ħarsien u tisħiħ tat-tradizzjonijiet kulturali f’pajjiżna. Dan kollu jsir primarjament fuq bażi volontarja u għalhekk, sabiex tissaħħaħ il-ħidma ta’ dawn l-għaqdiet, qed tiġi mnedija l-iskema għall-wirt artistiku. L-għan tal-iskema hu li tipprovdi għajnuna lill-organizzazzjonijiet matul is-sena sabiex jinvestu fil-preparamenti għall-attivitajiet li jsiru matul is-sena. Din l-iskema hija amministrata mill-Kunsill Malti għall-Arti fi ħdan il-Ministeru għall-Wirt Nazzjonali, l-Arti u l-Gvern Lokali.

L-organizzazzjonijiet volontarji għandhom ikunu attivi f’wieħed, jew aktar mill-oqsma li ġejjin:

• Fil-mużika strumentali għall-festa
• Fis-saħħa u s-sikurezza fil-kmamar tan-nar
• Fl-armar artistiku semi-permanenti

Il-proposti għandhom jikkwalifikaw bħala wieħed minn dawn li ġejjin: 

Proposti għal mużika strumentali għall-festa

• Programmi ta’ tagħlim u taħriġ mużikali mmirati għal surmastrijiet, l-assistenti surmastrijiet u għalliema.
• Proposti ta’ investiment fi ħtiġijiet edukattivi fejn jidħol it-tagħlim ekstrakurrikulari.
• Proġetti innovattivi li permezz tagħhom is-soċjetà jew għaqda tespandi l-attività mużikali tagħha kemm f’Malta kif ukoll barra minn Malta, liema attività trid tkun waħda sostenibbli.
• Proġetti sabiex is-soċjetà jew għaqda tinvesti fit-teknoloġija u l-komunikazzjoni biex ikolla strutturi (set-ups) aktar moderni għall-benefiċċju tal-membri tagħhom.
• Restawr tal-oġġetti/opri li għandhom, bħal pitturi, arkivji mużikali, planċieri, standardi, strumenti antiki u għamara antika, eċċ.
• Tisħiħ ta’ kollaborazzjoni bejn is-soċjetajiet tal-banda f’dak li għandu x’jaqsam mal-bandisti tagħhom. 
• Tisħiħ ta’ sistemi amministrattivi interni relatati mas-soċjetà jew għaqda u l-bandisti tagħhom.
• Tisħiħ, tisbiħ u restawr tal-infrastruttura eżistenti li permezz tagħha jistgħu jagħmlu l-ambjenti tat-tagħlim u eżekuzzjoni mużikali aktar professjonali jew/u sabiex iwettqu l-ħidma tagħhom b’mod aktar aċċessibbli.
• Twettiq ta’ proġetti jew programmi soċjokulturali jew mużikoletterarji. 

Proposti għas-saħħa u s-sikurezza fil-kmamar tan-nar

• Investiment f’apparat u f’armar biex in-nar ikun jista’ jinħaraq b’mod aktar sigur 
• Investiment f’makkinarji u f’għodod li jiffaċilitaw il-manifattura tan-nar u jżidu s-sigurtà tal-produzzjoni 
• Investiment f’riżorsi edukattivi dwar is-saħħa u s-sikurezza fil-manifattura tan-nar 
• Investiment fl-infrastruttura tal-kmamar tan-nar 
• Restawr tal-kmamar tan-nar 
• Tisħiħ ta’ kollaborazzjoni bejn il-kmamar tan-nar lokali u Ewropej. 

Proposti għall-armar artistiku semi-permanenti

• Disinn u manifattura ta’ bandalori  
• Disinn u manifattura ta’ festuni tad-dawl 
• Disinn u manifattura ta’ pavaljuni tad-drapp 
• Disinn u manifattura ta’ pavaljuni tad-dawl 
• Disinn u manifattura ta’ pedestalli artistiċi 
• Disinn u manifattura ta’ armar artistiku li jintrama fit-toroq waqt il-jiem tal-festa (dan jeskludi l-liedna) 
• Investiment ta’ tagħlim u tħarriġ relatat ma’ disinn u manifattura ta’ armar artistiku 
• Proġetti u attivitajiet kulturali 
• Proġetti u attivitajiet soċjali 
• Restawr ta’ kull tip ta’ armar artistiku li jintrama fit-toroq waqt il-jiem tal-festa (dan jeskludi l-liedna) 
• Statwi li jintramaw fit-toroq. 

Rekwiżiti konformi mal-Istrateġija

F’konformità mal-impenn tiegħu li jappoġġja l-arti permezz tal-approċċ sostenibbli u responsabbli tiegħu għall-investiment pubbliku, il-KMA jiġbed l-attenzjoni tal-applikanti għal dan li ġej f’konformità mal-Istrateġija 2025.

L-applikanti huma mitluba jikkunsidraw id-Dritt għall-Kultura – Pakkett ta’ Riżorsi meta jizviluppaw il-proposta tagħhom b’rabta ma’ kif jimpenjaw ruħhom mal-komunitajiet u l-konsiderazzjonijiet tad-drittijiet kulturali ta’ kulħadd fix-xogħol tagħhom. Il-pakkett ta’ riżorsi għandu l-għan li jżid l-għarfien dwar l-inklussività u jappoġġja l-implimentazzjoni tad-drittijiet kulturali fil-prattika tagħna ta’ kuljum.

L-applikanti huma meħtieġa wkoll jikkunsidraw il-Karta għall-Istatus tal-Artist meta jipproponu l-attivitajiet operattivi u ta’ programmazzjoni tagħhom biex jiżguraw kundizzjonijiet tax-xogħol aċċettabbli u deċenti għall-artisti u l-prattikanti kreattivi li jħaddnu l-libertà artistika, l-aċċessibbiltà, ir-rikonoxximent ta’ ħiliet formali/informali/non-formali, kundizzjonijiet soċjo-ekonomiċi deċenti, non-diskriminazzjoni u ekwità, konsiderazzjonijiet etiċi u aderenza mad-drittijiet tal-proprjetà intellettwali u l-liġi internazzjonali tax-xogħol. Il-Karta għall-Istatus tal-Artist hija maħsuba biex tipprovdi qafas dinamiku ta’ referenza għal kwalunkwe leġiżlazzjoni, politika, jew inizjattiva li jkollha impatt dirett jew indirett fuq l-artisti u s-setturi kulturali u kreattivi, u tiżgura li kwalunkwe azzjoni tkun allinjata mal-viżjoni aħħarijai fit-tul li tgħolli l-istatus tal-artisti f’Malta f’konformità mal-valur tanġibbli tagħhom għas-soċjetà.